அர்ஜென்டினாவைச் சேர்ந்த டென்னிஸ் வீரர் நிக்கோலஸ் கிக்கர். 25 வயதான இவர், கடந்த 2015-ம் ஆண்டு இத்தாலியின் படோவாவில் நடைபெற்ற ஏடிபி சேலஞ்சர் டென்னிஸ் தொடரின்போதும், அதேவருடம் செப்டம்பர் மாதம் கொலம்பியாவில் நடைபெற்ற தொடரில் பங்கேற்று விளையாடினார்.
அப்போது மேட்ச் பிக்சில் ஈடுபட்டதாக இவர் மீது குற்றம்சாட்டப்பட்டது. இதுகுறித்து டென்னிஸ் நேர்மைக்கு குழு விசாரணை நடத்தி வந்தது. அப்போது அவர் மீதான குற்றச்சாட்டு குறித்து விளக்கம் அளிக்கவில்லை. அத்துடன் டென்னிஸ் நேர்மைக் குழுவின் விசாரணைக்கு சரியாக ஒத்துழைக்கவில்லை. இதனால் நிக்கோலஸ் கிக்கர் குற்றவாளி என அறிவிக்கப்பட்டார்.
‘‘அவர் அனைத்து குற்றச்சாட்டிலும் குற்றவாளி என தெரியவந்துள்ளது. தனிப்பட்ட ஊழல் தடுப்பு விசாரணை அதிகாரி ஜேன் மல்காஹி தண்டனை விவரத்தை பின்னர் அறிவிப்பார். அவர் என்ன தண்டனை அறிவிக்கிறார் என்பது எங்களுக்கு கிடைத்த உடன் தெரிவிக்கப்படும்’’ என்று டென்னிஸ் நேர்மைக்குழு தெரிவித்துள்ளது.
